Edle Gestrenge, Ersame unndt weise Herren
den Herren seyen hinwiderumb meine dienst undt
Varumben Ich auf der Herren endtliche resolution
so starkh getrungen, das Ist aus mier allein Irem
vermeinen noch gantz nit hergefloßen, sonder so fern
Inen beliebig sein würdt, wollen sye ain Persohn her-
ausßer zuo mier abordnen, deren Ich so wol mein
habendte ordinantz, als auch was Ir Excell[enz] eben
gestern von Colmar aus, welche Statt albereit den
mit gewalt ubergangen, schrüfftlich an mich gelangen
lasßen, Inhalts, dieselben zuoberichten, wie es mit
Freyburg ein Beschaffenheit, unndt wo fern noch khein
annembliche resolution von Inen ervolgt were, wolte
ehr also balden den bewusten mars vornemmen, vor-
zuoweisen erbietig, wan sye nun Ihr Excell]enz]an-
khunfft undt deroselben unverhoffte Kriegsmittell
auf Ir feindtliches verharren erwarten w[o]llen,
weren sye gewüslich daß gantze Landt, so [w]olen
sich selber ihn eusersteruin undt lebensgefahr
setzen, darvor Ich sye vor mein Persohn gantz wol-
meinendt gewarnet haben will.
Vaß nun den Anderen Puncten, daß sye so vil hundert
Jar dem Hochlöbl[ichen]Haus Össterreich beygethan undt
incorporiert gewesen, Haben sye sich mit Schlettstatt,
Colmar, Ruffackh undt Entzisheimb als anderen
Össterreichischen orten, so ebenmäsßig Immediate dem
Haus Össterreich zuogethan gewesen, die auch zue
Defonsion umb vil bößer unndt ansenlicher ver-
fasst gewesen, ohne sondern ervolgendts khünffti-
ges nochreden wol zuoentschuldigen,
/
daß sye nun Ir [Fürstlich] [Durchlaucht]Margraff Friderichen
von Baden unndt Hochburg alß mit deme sye lange
Zeitt hero in guoter Nachparschafft gestanden, sich
bey disem Handel freindtlich zuo interponieren, er-
suochen lasßen, Ist es mier gar Lieb unndt annemblich.
Vaß dan daß vorgangne schüesen belangt, laß Ich
solches, weiln es nit auß Irem bevelkh, sonder aus
unverstandt der burg hergangen sein solle, an
seinem ort bewenden, gibe aber jedem Krüegs
verstendigen zuoerkhennen, daß solliches weilen
durch mein volkh einiger schutz nit hinein geschehen,
undt auch d[er] abgeordnete Trompeter eben sein an-
befolnes vorbringen gethon, billich vor ein offens
khan aufgenommen werdten.
Den Gaistlichem Patrem, weiln er ihn einsamblung
vor seine mitbrüeder etlich[er] victualien, unschuldiger
weis gefangen wordten, hob Ich auf der Herren
Intercession hiemit loß gelaßen. Welches hiemit
Ich den Herren ihn widerantwort nit verhalten,
erwarte hierüber einer endtlichen resolution, mit
nochmaligemunndt letsten erinnern Ihrer unndt des
gantzen landts ruin vorzuokhommen. Gott mit unß.
Geben Im Quartier Offhaußen den 22/12 [ten] Decemb[er] A[nn] 1632.
Freundt undt Dienst
willig[er]
Johann Dietrich von
Zylnhardt [mp]